அஷேன் சேனாரத்னவின் சுயேச்சைக்
குழுவின் வேட்புமனுவை நிராகரித்த தேர்தல்கள் ஆணைக்குழுவின் தீர்மானம் தொடர்பில் முன்னாள் வெளிவிவகார மற்றும் நீதி அமைச்சர், ஜனாதிபதியின் சட்டத்தரணி அலி சப்ரி கேள்வி எழுப்பியுள்ளார்.
இவ்வருட பொதுத் தேர்தலில் போட்டியிடும் நம்பிக்கையில் இருந்த சமூக ஊடக ஆர்வலர் அஷேன் சேனாரத்ன கொழும்பு மாவட்டத்தில் சுயேச்சைக் குழுவாக வேட்புமனுவைச் சமர்ப்பித்தார்.
"அங்கீகரிக்கப்பட்ட பிரதிநிதியால் வேட்புமனு தாக்கல் செய்யப்படவில்லை" என்ற அடிப்படையில் அவருக்கு வேட்புமனுவை வழங்க மறுத்ததாக தேர்தல் ஆணையம் தெரிவித்துள்ளது.
ஒரு வேட்பாளரின் தகுதிகளை விசாரித்து முடிவெடுப்பது மக்களின் பணியாக இருந்தாலும், தொழில்நுட்ப விடயத்தில் வேட்புமனுக்களை வழங்க மறுப்பது பிரச்சினைக்குரியது என அலி சப்ரி சுட்டிக்காட்டுகிறார்.
அவர் தனது உத்தியோகபூர்வ X கணக்கில் ஒரு குறிப்பை வெளியிட்டு இதை குறிப்பிட்டிருந்தார்.
“அங்கீகரிக்கப்பட்ட பிரதிநிதி அல்லாத ஒருவரால் வேட்புமனு தாக்கல் செய்யப்பட்டாலும், அதை ஏற்கும் முன் தேர்தல் நடத்தும் அதிகாரி அதை சரிபார்க்க வேண்டாமா? முதலில் தொடர்புடைய ஆவணங்களை ஏற்றுக் கொண்டு, காலக்கெடு முடிவடையும் வரை காத்திருந்து, பின்னர் முழு பட்டியலையும் நிராகரிப்பதை ஏற்க முடியுமா? அடிப்படைத் தவறு இருந்தாலும் அதைத் திருத்த வாய்ப்பு அளிக்காதது தேர்தல் அதிகாரியின் கடமையா?
தேர்தல் ஆணையகத்துக்கு ஒதுக்கப்பட்ட பணி, மக்கள் முடிவெடுக்கும் உரிமையை எளிதாக்குவதே தவிர, தொழில்நுட்ப அடிப்படையில் அதை தடுப்பது அல்ல. அவர்களின் பணி செயல்முறையை வழிநடத்துவதும், மக்கள் தங்கள் வாக்குரிமையைப் பயன்படுத்துவதை உறுதிசெய்வதும் ஆகும், வேட்பாளர்களைத் தண்டிப்பது அல்ல என தெரிவித்துள்ளது.
