அரசியல் இருப்புக்காக சமூகங்களை பலியாக்காதீர்கள்: கலையரசனுக்கு - யஹியாகான் கூறுகிறார்!

பாராளுமன்றத்தின் உள்ளேயும் வெளியேயும் கலையரசன் எம்பியின் இனவாதக் கருத்துக்கள்  இன மோதல்களை தூண்டும் விதமாக உள்ளதாக சுட்டிக்காட்டி யஹியாகான் - அறிக்கை ஒன்றை விடுத்துள்ளார்.

மக்களால் நிராகரிக்கப்பட்டு - தேசியப் பட்டியல் எனும் பின்கதவால் பாராளுமன்றம் நுழைந்துள்ள கலையரசன் -  மக்களின் வாக்குகளால் பாராளுமன்றம் நுழைய இரு சமுகங்களையும் பிரித்தாழும் கைங்கரியத்தை முன்னெடுத்து வருகிறார்.

அரசியலில் வங்குரோத்து நிலையை அடைந்துள்ள கலையரசன் எம்பி - தமிழ், முஸ்லிம் மோதலை தூண்டிவிட எடுத்த முயற்சியை - தமிழ் மக்களே முன்னின்று தகர்த்தெறிந்தமை கடந்தகால வரலாறு. அதாவது , கடந்த பாராளுமன்ற தேர்தலில் படு தோல்வியை தமிழ் மக்கள் அவருக்கு வழங்கினர்.

கருணா வந்ததால்தான் - அம்பாரை மாவட்ட தமிழ் பிரதிநித்துவம் பறிபோனது என்று நொண்டிச்சாட்டைக் கூறினாலும் - கலையரசனின் இனவாதக் கருத்துக்களே அவரை தோற்கடிக்க வைத்தது என்ற உண்மையை தமிழ் மக்களே இன்று பகிரங்கமாக கூற முனைந்துள்ளனர்.

இதேபோல்தான் , அம்பாறை மாவட்ட எம்பியாக இருந்த கோடீஸ்வரனுக்கும் ஏற்பட்டது என்பதை இங்கு நினைவுபடுத்த விரும்புகிறேன்.

தமிழ் - முஸ்லிம் சமுகம் என்றும்போல் இன்றும் இரண்டரக் கலந்து நட்புப் பாராட்டி வாழ்ந்து வருகின்றனர். இதனை குழப்பியடிப்பது இந்த கலையரசன் மற்றும் கோடீஸ்வரனைப் போன்றவர்கள்தான்.

வெளி மாவட்டங்களில் இருந்து இறக்ஙசெய்யப்படும் சில இளைஞர்களைக் கொண்டு - துவேஷத்தை விதைத்து அம்பாரை மாவட்ட தமிழ் - முஸ்லிம் உறவில் விரிசலை ஏற்படுத்த கலையரசன் முனைவதை தமிழ் மக்கள் அறியாமலில்லை. இதற்கான தகுந்த பாடம் அடுதத பாராளுமன்ற தேர்தலில் கிடைக்கும் என்பதை அவர் புரிந்து வேண்டும்.

எந்தவொரு விடயத்திலும் தீர்வு எட்டப்படும் போது - அது தமிழ் சமுகத்தையும் பாதிக்காத வகையில் எட்டப்பட வேண்டும் என்பதே முஸ்லிம் சமுகத்தின் எதிர்பார்ப்பும் முடிவுமாகும் என்பதை இங்கு கோடிட்டுக் காட்டி - அற்பத்தனமான அரசியலுக்காக இரு இனங்களையும் மோதவிட துடிக்கும் கைங்கரியத்தை கலையரசன் கைவிட வேண்டும் என கேட்டுக் கொள்கிறேன்.

ஏ.சி. யஹியாகான்
பிரதிப் பொருளாளர்
முஸ்லிம் காங்கிரஸ்.